‘Mi mami es lista’ (Avenida de Fragoso, 83) é unha tenda de artigos para bebé na que, segundo aseguran os seus promotores, se defende o respecto polo planeta, coa reutilización e a economía circular, así como o traballo con provedores ‘ecofriendly’. Xa levan varias campañas con asociacións como Amigos da Terra.
Agora presentan un novo proxecto para contribuír á recuperación dos nosos bosques tras o desastre ocasionado en Galicia polos terribles incendios do pasado 2017: “Para conseguilo non escatimaremos en esforzos e doaremos unha árbore autóctona por cada carriño de bebé vendido. Así, cada bebé MIMAMI virá a este mundo xunto cunha fermosa árbore que lle acompañará o resto da súa vida”.
“A intención é, ademais de contribuír á mellora do medioambiente, facervos partícipes do proxecto a todos. Por iso todos estades convidados a acompañarnos e participar nas distintas plantacións que realicemos ao longo do ano, plantando vós mesmos a árbore do voso bebé, e se non, nós facémolo por vós e enviámosvos unha foto do mesmo coas coordenadas, para que poidades visitar o Bosque MIMAMI sempre que vos apeteza”, engaden.
Resumen a iniciativa como “un sinxelo xesto que non só axuda a que volvan revivir os nosos queridos bosques, senón que lle dará un compañeiro para sempre a cada neno e que poderá visitar e coidar sempre que queira sentirse en contacto coa natureza”.
A primeira xornada de reforestación será o domingo 23 de decembro ás 11:30 da mañá no Parque Forestal O Maruxento. “Unha forma de festexar o Nadal dunha maneira diferente”, subliñan.
Contan coa inestimable colaboración da Comunidade de Montes de Matamá, unha das zonas de Vigo máis castigadas polos incendios de outubro de 2017. “Sen a súa axuda non pasaría de ser un simple soño”, recoñecen.
Para participar nesta primeira plantación tan só é necesario apuntarse na tenda física de Fragoso ou enviar un mail a tienda@mimamieslista.com indicando os datos de contacto e o número de asistentes.
“Fun aos bosques porque quería vivir deliberadamente; enfrontar só os feitos da vida e ver se podía aprender o que ela tiña que ensinar. Quixen vivir profundamente e refugar todo aquilo que non fose vida… Para non darme conta, no momento de morrer, que non vivira”. Así falaba o escritor e filósofo estadounidense H.D. Thoreau.
