O alcalde de Vigo, Abel Caballero, avanzou este luns a programación municipal para as festas do Entroido 2026, que incluirá pasacalles, comparsas e a actuación estelar da orquestra París de Noia. Tal como explicou o rexedor, será a partir do 13 de febreiro cando dea comezo a celebración na cidade, estendéndose as actividades ata o mércores de Cinza, o día 18. Ante a proximidade das datas, o Concello xa abriu o prazo de inscrición para todas aquelas formacións que desexen participar no concurso de comparsas e carrozas.

“Un Entroido magnífico. Imos a por todas”, apuntou Caballero ao debullar os detalles dun calendario que arrancará o venres con animación na rúa da man da Charanga Imperiais e do grupo de batucada Bate no Cobre. Ese mesmo día levaranse a cabo os tradicionais desfiles de cabezudos e a entronización do Meco, que terá lugar ás 20:30 horas na Porta do Sol. Como prato forte da xornada inaugural, a París de Noia ofrecerá un concerto no corazón da cidade.

O evento central, o desfile de comparsas, celebrarase o sábado a partir das 18:00 horas, mantendo o seu percorrido habitual con saída desde a rotonda de Isaac Peral. As festas concluirán oficialmente o martes coa queima do Meco ás 20:45 horas, poñendo o broche final a cinco días de retranca e cor polas rúas viguesas.