A plataforma SOS Sanidade Pública de Vigo animou este venres a participar na manifestación nacional convocada para o 1 de febreiro en Santiago de Compostela. Para facer este chamamento, o colectivo organizou unha concentración ás portas do hospital Álvaro Cunqueiro, ao que definiron como a “zona cero dos recortes sanitarios” e un “banco de probas” para as políticas de privatización que, segundo denuncian, afectaron gravemente á área sanitaria viguesa.

Os membros da organización criticaron duramente o actual modelo de xestión do centro, insistindo en que se construíu un hospital con menos capacidade da necesaria para favorecer o negocio da sanidade privada. Entre os problemas máis urxentes, destacaron o colapso crónico do servizo de Urxencias, a falta de camas operativas e unhas listas de espera que cualificaron de “intolerables” tanto para consultas especialistas como para intervencións cirúrxicas. Así mesmo, puxeron o foco no concerto con Povisa, denunciando a falta de transparencia económica e a ausencia dunha alternativa 100 % pública para os seus usuarios.

A denuncia tamén se estendeu á Atención Primaria, onde sinalan un déficit estrutural de persoal e unha sobrecarga dos profesionais derivada da falta de recursos. Ante esta situación, SOS Sanidade Pública esixiu unha “reconstrución” do sistema que pase por rescatar a concesión do Álvaro Cunqueiro, poñer a pleno rendemento o Meixoeiro e o Nicolás Pena, e construír un Centro de Alta Resolución no centro de Vigo. Ademais, reclamaron a recuperación de servizos especializados e o aumento do orzamento para novos centros de saúde e puntos de atención continuada (PAC).