A Fiscalía pide penas de 5 anos e 4 anos e 8 meses de prisión para os dous supostos autores dun atraco a punta de pistola, en abril de 2023, nunha sucursal de Abanca en Vigo, e que serán xulgados este mércores na sección penal, praza 2 da cidade olívica.

Segundo o escrito de acusación pública, os feitos ocorreron o 14 de abril de 2023, pouco antes das 14.00 horas, cando dúas persoas entraron en oficina de Abanca situada no número 64 da rúa Martínez Garrido. Un deles levaba perruca, lentes de sol e máscara, mentres que o outro se ocultaba parcialmente cunha ‘braga’ de pescozo e unha gorra, e ambos portaban o que parecían ser pistolas.

Mentres exhibían as armas, cominaron á persoa que estaban na sucursal (un cliente, o director, a subdirectora e outras dúas empregadas) a meterse na zona da caixa forte, e alí esixiron a apertura de todos os dispositivos que contivesen diñeiro, mentres advertían de que, se activaban as alarmas, empezarían “os tiros”.

Con estas ameazas e intimidacións, lograrse facerse cun total de 117.465 euros, procedentes da caixa forte, dun dos caixeiros e dun dispensador de billetes. A continuación, obrigaron ao director da sucursal a que lles dese as chaves do seu coche, un BMW estacionado nas inmediacións, co que fuxiron.

A Policía detívoos e logrou recuperar o coche, que apareceu pouco despois do atraco sen danos, e parte do botín subtraído, algo máis de 32.000 euros. Ademais, no rexistro do domicilio dun dos acusados, os axentes incautáronse de 15,5 gramos de heroína.

Por estes feitos, a Fiscalía acusa aos dous procesados dun delito de roubo con intimidación. Para un deles pide 5 anos de cárcere (coa circunstancia agravante de reincidencia) e para o outro reclama 4 anos e 8 meses de prisión. Ademais, pide que ambos indemnicen conxuntamente a Abanca nos case 85.000 euros do botín que non foron recuperados.