A sección quinta da Audiencia Provincial de Pontevedra, con sede en Vigo, acolle esta semana dous xuízos por delitos de estafa que afectan a bens de primeira necesidade e servizos básicos. No primeiro dos casos, que se celebrará este martes, o Ministerio Fiscal solicita unha pena de 6 anos de prisión para un home acusado dun delito continuado de estafa agravada.
Segundo o escrito de acusación, o procesado, coa axuda dun cómplice, enganou a unha persoa ofrecéndolle dous alugueiros na cidade olívica, un para o propio prexudicado e outro para un amigo. O acusado chegou a cobrar 1.810 euros en concepto de arrendamento e seguros de falta de pagamentos, facendo asinar á vítima contratos falsos. Tras o pago, descubriuse que unha das vivendas non existía e a outra xa estaba ocupada por outra familia. Pola gravidade de afectar ao dereito á vivenda, a Fiscalía pide tamén unha multa de 4.320 euros para o autor principal e un ano de cárcere para o seu colaborador, ademais da devolución íntegra do diñeiro con intereses.
ESTAFA NA CONTRATACIÓN DUNHA OBRA
Doutra banda, este luns sentan no banco dos acusados tres persoas vinculadas a dúas empresas de reformas. A Fiscalía sostén que os procesados acordaron co dono dunha vivenda en Vigo a realización de obras por un orzamento inicial de 38.720 euros, que posteriormente foi incrementado con novas partidas. A vítima, confiada pola aparencia de solvencia empresarial dos acusados, entregou un adianto de 15.700 euros.
Con todo, o escrito fiscal sinala que os acusados apenas realizaron unha “ínfima actividade de demolición” co único obxectivo de simular o inicio dos traballos. Tras cobrar o adianto, non volveron pola obra nin devolveron os cartos. Por estes feitos, o Fiscal acúsaos como coautores dun delito de estafa e solicita para cada un deles unha pena de dous anos de cárcere, xunto coa obriga de indemnizar ao afectado pola cantidade estafada.
