A sección quinta da Audiencia Provincial de Pontevedra acollerá a vindeira semana dous xuízos contra senllos acusados de delitos de agresión sexual a menores de idade. Os procesados enfróntanse a peticións de pena que suman 5 anos e 4 anos e cinco meses de prisión, respectivamente, ademais de diversas medidas de inhabilitación e liberdade vixiada.
Este martes sentará no banco un home acusado de agredir sexualmente a unha nena en setembro do ano pasado no portal do edificio no que ambos residían. A Fiscalía pide para el 5 anos de cárcere e outros 5 de liberdade vixiada con obriga de participar en programas de educación sexual. Así mesmo, reclama a privación da patria potestade por sete anos e a inhabilitación para calquera oficio que leve contacto con menores durante unha década. O ministerio público solicita tamén a prohibición de achegarse á menor durante 7 anos e unha indemnización de 2.000 euros por danos morais.
O mércores celebrarase o xuízo contra outro home por unha suposta agresión sexual a unha menor prevaléndose dunha relación de parentesco, ao ser ascendente directo da vítima. Os feitos ocorreron en 2024 no domicilio compartido. A Fiscalía solicita unha pena de 4 anos e 5 meses de cárcere, xunto coa prohibición de aproximarse ou comunicarse coa menor durante 3 anos.
Neste segundo caso, a petición inclúe a inhabilitación para o exercicio da patria potestade ou tutela por 5 anos e para calquera profesión con contacto con menores por un período superior en 6 anos á pena de prisión imposta. En canto á responsabilidade civil, o ministerio público reclama 4.200 euros polos máis de 100 días de tratamento psicolóxico que requiriu a menor, ademais doutros 3.000 euros por danos morais.
