O Parlamento de Galicia acolleu este mércores un tenso debate sobre a xestión de Ribera Povisa en Vigo. A deputada do BNG, Montserrat Prado, esixiu á Xunta transparencia absoluta e que faga público o contido íntegro do contrato co hospital vigués. A petición xorde tras saír á luz unhas gravacións nas que o entón CEO de Ribera Salud suxería a directivos do Hospital de Torrejón (Madrid) rexeitar pacientes ou aumentar as listas de espera para mellorar os beneficios económicos da empresa.
Prado cualificou de “actuación criminal” que unha empresa privada priorice os seus resultados á conta da saúde e denunciou o “escurantismo” da Xunta. “Din que o contrato é público, pero só sabemos o importe, non as esixencias á empresa nin o número de profesionais”, criticou a nacionalista, quen tamén solicitou unha auditoría externa da xestión.
Pola súa banda, o conselleiro de Sanidade, Antonio Gómez Caamaño, defendeu que existen mecanismos de control “moi esixentes” para supervisar a actividade de Povisa. Asegurou que este seguimento garante que os pacientes sexan atendidos baixo as mesmas garantías que os usuarios do Sergas e afeou ao BNG o que considera un “oportunismo político” por tratar de trasladar a Galicia unha polémica ocorrida en Madrid.
O titular de Sanidade lembrou que o novo modelo de relación co centro vigués é un contrato de servizos, o que supón que a administración autonómica só paga polos procedementos que son realmente realizados. Estableceuse un tope de 97,4 millóns de euros ao ano, e o conselleiro insistiu en que existe unha unidade específica de supervisión formada por profesionais da área sanitaria de Vigo que realiza un seguimento estrito desde o inicio do acordo.
