O Parlamento de Galicia aprobou este xoves a proposición non de lei do Grupo Popular, co voto en contra do PSdeG, a través da que se solicita ao Goberno central o mantemento da cidade de Vigo, xunto con Santiago de Compostela, como sede para a realización dos exames de formación sanitaria especializada (MIR) en Galicia.

“É unha demanda que nace do sentido común, da evidencia técnica e do recoñecemento á realidade sanitaria e universitaria galega”, indicou a deputada popular Patricia García, que considera que eliminar Vigo “non é só un erro político, senón que é unha decisión incomprensible, sen criterios técnicos coñecidos e tomada sen diálogo coas comunidades”.

Patricia García defendeu “unha proposta positiva, leal institucionalmente e centrada no que de verdade importa: a cidade de Vigo, os aspirantes e o sistema sanitario galego”.

Pola súa banda, a socialista Elena Espinosa mostrouse moi crítica cos populares aos que lembrou que o PSdeG xa levou unha petición similar ao Pleno do Concello de Vigo, “onde o PP votou en contra”.

Así, recoñeceu que a ministra de Sanidade, Mónica García, “equivócase”, pero matizou que a retirada de Vigo está nunha proposta do ministerio onde se reducen as cidades sede de 28 a 22 en toda España — incrementáronse con motivo da Covid-19 –.

A deputada do BNG, Iria Carreira, reflexionou sobre a igualdade de oportunidades e a accesibilidade que supón ter máis sedes, pero lamentou que se poña o foco no incorrecto e non nas condicións dos residentes.

Considera que se trata dun escenario orquestrado polo bipartidismo para converter o Parlamento, ou o Concello de Vigo, nunha “especie de caixa de resonancia onde o importante é a confrontación PP-PSOE”.