O BNG de Vigo reclamará no próximo pleno municipal a dimisión do presidente da Xunta, Alfonso Rueda, pola súa “neglixente” xestión da onda de incendios que afectou a Galicia este verán.

Segundo informan os nacionalistas nun comunicado, no pleno proporán unha moción para esixir ao Executivo autonómico un cambio estrutural na política forestal e territorial da Xunta, a quen responsabilizan das “devastadoras” consecuencias dos lumes.

“O que vivimos non foi unha traxedia natural, senón a consecuencia directa dunha política forestal fracasada e dunha xestión neglixente por parte da Xunta do PP“, denunciou o portavoz municipal do BNG, Xabier Pérez Igrexas.

El criticou que o Goberno autonómico deixou ata 11 millóns de euros sen executar destinados a labores de prevención. “Faltou planificación, prevención e medios. Sobraron improvisación e propaganda“, engadiu.