A Policía Local de Vigo detivo este pasado xoves a un home, de Senegal e 32 anos de idade, como suposto autor dun delito de roubo con forza en grao de tentativa ao tratar de facerse cun móbil nunha tenda.
Os feitos ocorreron sobre as 10.30 horas nun establecemento situado na rúa Urzaiz. Alí, os responsables do local solicitaron a presenza policial por un suposto roubo. Unha vez no punto, os axentes observaron no interior a un home, en actitude “agresiva”, suxeitando un teléfono que non era da súa propiedade.
Segundo el mesmo explicou, comprara un terminal media hora antes nesa tenda. Cando o acendeu, descubriu na axenda de contactos un número gardado que descoñecía. Por iso, chamou, contestando unha voz que identificou como a do propietario que lle vendeu ese móbil.
Por iso, o home volveu á tenda para esixir explicacións, iniciándose unha discusión e introducíndose no interior do mostrador para arrebatarlle das mans ao propietario do establecemento outro móbil que portaba. No entanto, os empregados lograron retelo.
Todo iso foi gravado polas cámaras de vixilancia da tenda, sendo o terminal subtraído propiedade doutro cliente, que o deixou alí para o seu arranxo. Polos sucesos relatados, foi detido.
