O director territorial da Consellería de Educación, Ciencia, Universidades e FP na provincia de Pontevedra, César Pérez, confirmou o reforzo docente do IES Valadares, en Vigo, para o próximo curso, despois de que a dirección deste instituto presentase a súa dimisión por “falta de recursos” para atender a alumnos con necesidades.
Así o sinalou Pérez tres reunirse este martes co novo director do centro, trasladándolle ao novo responsable, que ata agora ocupaba o cargo de xefe de estudos, que a partir de setembro incorporarase ás aulas un orientador a maiores do que xa tiña o centro e un especialista en Pedagoxía Terapéutica, “a máis do cadro de profesorado que lle corresponde por catálogo segundo o número de alumnos”. Ademais, nun comunicado, o director territorial sinalou que o seu departamento avaliará a posibilidade de ampliar a xornada completa a dedicación do docente de reforzo do programa PROA.
Para César Pérez, o encontro co novo director do IES Valadares foi “moi frutífero”, reivindicando o compromiso da Xunta con este centro que é “un referente de inclusión” en Vigo. Por iso, tamén se comprometeu a avaliar a demanda do instituto de mellorar as instalacións do taller de arte. Todo iso días despois de que a dirección do IES Valadares presentase a súa dimisión pola “falta de recursos” para atender aos alumnos con necesidades especiais, lanzando fortes críticas á Xunta de Galicia.
