O Tribunal Superior de Xustiza de Galicia (TSXG) confirmou a sentenza da sección quinta da Audiencia de Pontevedra, con sede en Vigo, que condenou a 4 anos de cárcere a un membro dun clan como autor dun delito continuado de extorsión. A sentenza do tribunal provincial considera probado que, en setembro de 2020, a vítima acudiu coa súa parella a un escampado na zona de Tomiño, onde se atoparon co acusado que, supostamente, ía axudala a cobrar unha débeda. Pero o que ocorreu foi que o procesado esixiulle a ela que lle entregase 6.000 euros, baixo a ameaza de “pegarlle un tiro na cabeza ou queimala dentro do coche”.
O acusado tamén ameazou con matar á filla e aos pais da muller, mentres lle ensinaba dúas pistolas que levaba no seu coche. Dous días despois destes feitos, a muller tivo un accidente grave de coche, que a levou a estar hospitalizada. A partir de aí, o acusado comezou a chamala para esixirlle que lle dese o diñeiro que recibise do seguro polo accidente. Mesmo, ante a tardanza en cobrar, obrigouna a ir ao posto da Garda Civil do Porriño, acompañada por unha muller e unha menor da confianza del, para preguntar por que tardaba tanto en pagar o seguro. Cando cobrou uns 17.400 euros, a muller asegurou que o acusado acompañouna a unha sucursal bancaria e, tras apuntala cunha pistola, obrigouna a entrar e a retirar máis de 15.000 euros, dos que se apropiou.
Tempo despois, o procesado obrigouna a comprar dous teléfonos móbiles de máis de 1.000 euros, para logo vendelos nunha tenda de segunda man e quedar el co diñeiro. Máis tarde, esixiulle ir a un concesionario con outro individuo a comprar un coche duns 24.000 euros, que foi vendido por 14.000 euros. Segundo expuxo a Audiencia na súa resolución, a muller encartouse a todas as esixencias do acusado por temor. A defensa presentou recurso ante o TSXG alegando que se realizou unha errónea valoración da proba e tratando de que se aplicase a atenuante de dilacións indebidas. No entanto, o alto tribunal galego non aceptou ningún destes argumentos, e igualmente rexeitou a explicación dada na sala polo acusado, que asegurou que tivera unha relación sentimental coa muller e que ela o denunciou por despeito.
