O portavoz do Grupo Popular do Parlamento de Galicia, Alberto Pazos, criticou a “nefasta xestión” das festas na cidade de Vigo, e reivindicou que a lei de espectáculos de Galicia, que data de 2017, “aplícase con total normalidade en 312 dos 313 concellos galegos”.
Así o sinalou en rolda de prensa este venres, subliñando que é “sorprendente” que a normativa “só cause problemas” en Vigo, o que acredita, ao seu xuízo, “que non é un problema da normativa, senón de xestión eficiente do Concello”.
Todo iso, tal como dixo, tras coñecerse a suspensión das festas do barrio de Coia, en Vigo, e do “perigo” que corren as de Bouzas, pola “parálise” na tramitación das solicitudes que leva a cabo o goberno local.
“Como non podía ser doutra forma, o alcalde Vigo, Abel Caballero, pretende escudarse na existencia dunha lei galega que este Parlamento non tramitou e non temos coñecemento. Non se se se refire ao decreto da Xunta para facilitar a aplicación dunha lei que si tramitou este Parlamento en 2017 e que non supuxo ningún problema para as celebracións das festas nas parroquias de Vigo ata o momento, e a instalación das atraccións tampouco se viu obstaculizada pola lei ata agora”, apuntou, lembrando que algunhas destas instalacións formaron parte do Nadal de Vigo.
Por todo iso, Pazos pediu ao goberno local de Vigo que vele máis por prestar apoio ás festas populares “en lugar de imaxinar uns culpables da súa nefasta xestión”.
