Un home acusado de condución temeraria aceptou penas que suman un ano de prisión por lesións imprudentes e por abandono do lugar do accidente, nunha vista de conformidade celebrada no xulgado do penal 2 de Vigo.

O sinistro ocorreu na madrugada do 29 de abril de 2023, cando o procesado conducía o seu coche de alta gama (un Porsche Cayenne) pola AP-9 no termo municipal de Vigo. Segundo o escrito de acusación da Fiscalía, o condutor circulaba “a unha velocidade excesiva e sen a atención precisa”.

Ao facer un adiantamento, a aleta dianteira do seu coche impactou contra o lateral traseiro do outro vehículo, que se desprazou e acabou chocando contra a bionda da autoestrada. O acusado, en lugar de deterse, seguiu circulando uns 300 metros e acabou abeirando o seu coche, saíndo e deixando o vehículo abandonado na AP-9.

Como consecuencia do impacto, o condutor do outro coche sufriu unha escordadura cervical, e o seu coche foi declarado ‘sinistro total’. Ademais, os danos na bionda da autoestrada superaron os 1.000 euros. Por estes feitos, o ministerio público pedía inicialmente 4 anos e 3 meses de cárcere, e retirada do carné durante 6 anos e medio. Finalmente, a condena quedou nun ano de prisión, e retirada do carné de conducir durante dous anos.