A presidenta do PP de Vigo, Luisa Sánchez, acusou ao alcalde, Abel Caballero, de ser “responsable político” das condenas por corrupción que acumulan socialistas vigueses. A última delas, segundo dixo, produciuse este mesmo mércores, cando o ex alcalde pedáneo de Bembrive, Roberto Ballesteros, recoñeceu ante o xuíz elaborar facturas falsas e, por tanto, ser culpable de novos delitos de prevaricación, malversación de caudais públicos e falsidade documental.
Tal como lembrou, é a cuarta condena que se lle impón a este representante socialista, “ao que Caballero puxo á fronte das listas electorais á Pedanía de Bembrive en dúas ocasións” para despois gardar “silencio” ante os “escándalos” xulgados. A estes casos habería que sumar, a xuízo de Sánchez, a condena por prevaricación na adxudicación de contratos públicos do sucesor de Ballesteros na Entidade local Menor, Marcos Castro.
“Non entanto, ningunha das sentenzas que salpicaron á Pedanía de Bembrive serviron para restaurar a normalidade nesta institución, xa que o seu actual responsable, a socialista Patricia Otero, leva catro anos sen render contas ante o Consello de Contas”, lamentou a diligente ‘popular’. Luisa Sánchez lamentou que o alcalde vigués “fale moito cando lle convén e escóndase cando ten que dar explicacións”.
