‘La felicidad de los perros’, ópera prima de David Hernández, director de cinema vigués que competía na 56º edición do Festival de Cinema de Xixón (FICX), vén de recibir o premio DCP Deluxe outorgado polo xurado de cinema español.
A película tivo a súa estrea mundial neste festival e competía dentro da sección Rellumes. Este é a primeira distinción que recibe a película e para o seu director “é un premio moi importante, que nos enche de felicidade, porque é unha pequena recompensa ao traballo de todo o equipo durante todos estes anos de produción da película”.
O actor protagonista (Fran Paredes) e unha parte do equipo estiveron en Xixón durante a celebración do festival acompañando ao seu director nos diferentes pases que tivo a longametraxe.
A acollida por parte do público foi moi boa e en palabras de David Hernández: “É moi gratificante poder participar nos coloquios co público que se establecen ao finalizar o pase da película, porque a través dos seus comentarios e preguntas entendes mellor o traballo que fixeches, é coma se a produción terminase realmente nese momento, establécense conexións moi intensas ao falar directamente cos espectadores”.
Outros realizadores galegos tamén foron galardoados no festival, “ Hamada”, de Eloy Domínguez Serén, obtivo o premio á mellor película española estreada en seccións competitivas e “ Arima” de Jaione Camborda o premio DCP DeluxeWork- in- progress.
“La felicidad de los perros” está a competir actualmente na Sección Oficial do Festival de Cinema Márgenes (Madrid) e pode verse online ata o 30 de novembro na web do festival .
A primeira longametraxe do cineasta vigués é un drama que ten como protagonista a César, un home en paro, que se sinte atrapado nun mundo que non lle dá ningunha oportunidade e ante o cal decide cambiar o rumbo da súa vida.
O papel principal está encarnado por Fran Paredes, actor moañés, cunha longa traxectoria en teatro e televisión e para o cal é o seu primeiro papel protagonista nunha longametraxe. A repartición complétase cos actores galegos Deborah Vukusic, Santi Prego, Isabel Naveira e Mariana Carballal.
