O grupo municipal do PP no Concello de Vigo solicitou ao goberno local que contrate unha asistencia técnica externa que se encargue de supervisar a montaxe das atraccións nas festas de verán, tras o accidente que custou a vida a un mozo no Saltamontes, durante os festexos da parroquia de Matamá, en agosto do ano pasado (un accidente que está a ser investigado polo xulgado de instrución 3 de Vigo).
Así o trasladou o PP á Concellaría de Festas a través dun rogo formulado nas comisións informativas do presente mes de maio. O portavoz do grupo, Miguel Martín, reclamou ao rexedor socialista que cumpra coa Lei de Espectáculos Públicos de Galicia, que obriga ás administracións locais a revisar e comprobar as atraccións de feira das festas populares. “Unha responsabilidade que o goberno de Abel Cabalero sacudiuse de enriba o ano pasado ao eludir o seu labor”, lamentou.
Neste sentido, o concelleiro popular urxiu ao alcalde de Vigo a suplir esta falta de medios coa contratación dunha firma especializada, unha “práctica habitual” noutros municipios “moito máis pequenos e con menor capacidade económica”. Para o PP de Vigo, o “desgraciado e fatídico” accidente ocorrido o pasado verán no ‘Saltamontes’ veu precedido dun “absoluto abandono de funcións deste goberno municipal”, xa que a atracción estivo a operar con total normalidade a pesar de non obter o correspondente permiso municipal de instalación.
“O mesmo que xa pasara anteriormente nas festas de Beade, onde tamén estivo a traballar sen a autorización municipal pertinente. Ninguén supervisou en ningún momento a instalación desta atracción e, o que é peor, ninguén a obrigou a cesar a súa actividade por carecer de licenza”, criticou. Miguel Martín sinalou ao goberno local como “máximo responsable” de todo isto porque “súa é a obrigación última de facer cumprir a lei”. “Cousa que non fixo. Moi ao contrario, lamentablemente asistimos a un intento por tratar de lavar as mans e sacudirse de enriba a súa responsabilidade tratando vergonzosamente de imputarlla a outros”, engadiu.
