O Concello da Guarda recomendou aos seus veciños non beber auga da traída nin cociñar con ela durante os próximos dous días debido aos sedimentos que presenta polo arrastre de lodos.

Nun comunicado, o goberno municipal informou da detección de turbidez na rede de abastecemento municipal, provocada polo arrastre de lodos e sedimentos cara ás captacións, debido ás intensas choivas dos últimos días.

Segundo sinalaron fontes municipais, a auga continúa recibindo os tratamentos de desinfección habituais pero recoméndase non usala para beber ou cociñar “ata que se normalice a situación e recupere os niveis óptimos de claridade”.

Igualmente, o Concello solicitou ás persoas que dispoñen de filtros de sedimentos instalados no contador que procedan á súa revisión, porque poderían atoparse obstruidos.

Finalmente, agradeceu a “comprensión” dos veciños e lembrou que, ante calquera dúbida ou incidencia, poden porse en contacto co Consistorio polas canles habituais.