O alcalde de Vigo, Abel Caballero, esixiu este martes á Xunta de Galicia que devolva o terreo onde se asentaban os antigos xulgados da rúa Lalín, e onde a Xunta proxectaba construír un centro de asociacionismo, que agora esta paralizado despois de que o Concello revogase a licenza de obra outorgada un par de meses antes.
O conflito por estes terreos xurdiu a principios deste ano, cando o goberno municipal comunicou publicamente que suspendía a licenza outorgada no mes de novembro. Nese momento, o goberno de Abel Caballero xustificou que, tras conceder ese permiso, tivo coñecemento de que o titular do chan é o Concello.
A Xunta de Galicia, pola súa banda, mantén que ese edificio foi transferido polo Estado en propiedade e sen vinculación de destino, e que tanto a parcela como o edificio foron dados de alta no Inventario Xeral de Bens e Dereitos de Galicia, “sen condicionamento de ningún tipo”. De feito, lembrou o goberno galego, por esa inmoble a Xunta estivo pagando IBI ás arcas municipais (máis de 41.000 euros en 2024).
Á espera de que se aclare a titularidade dese terreo, o goberno municipal insistiu en que debe ser devolto para que o Concello constrúa alí dotacións municipais, un proxecto do que, polo momento, non se coñecen detalles.
Este martes, Abel Caballero sinalou que esas dotacións servirán para “atender á xente de Coia, de Navia e de Bouzas”, e que contarán cun auditorio e unha sala de concertos. Así mesmo, o rexedor afeou á Xunta que actúe “coma se todo fose deles”: “Teñen unha caradura política inmensa”.
Segundo matizou o rexedor, ante a denuncia da Xunta de que o goberno municipal quere impedir o seu proxecto e un investimento de 24 millóns de euros, non se trata de que o Concello non permita á administración autonómica construír aí, senón que reclama o chan para facer o seu propio proxecto.
Hai uns días, a Xunta informou de que, en vista da paralización da actuación, vese abocada a resolver o contrato que tiña coa empresa que se ía a encargar da reforma do edificio.
Así, lamentaba ter que tomar a decisión en vista de que o Concello non respondeu ás alegacións presentadas en febreiro, e tendo en conta que, para a dita actuación, había comprometidos fondos propios e fondos europeos. Ademais, apuntaba que debe actuar así ante a previsión de que de que este conflito acabará nos tribunais, e ata que non se resolva.
