Un home de 78 anos de idade resultou ferido na tarde deste pasado luns en Mos despois de que supostamente o seu fillo, de 43 anos, o asperxese con gasolina e lle prendese lume. Segundo explica o subdelegado do Goberno na provincia de Pontevedra, Abel Losada, o home sufriu queimaduras nunha perna, polo que foi trasladado a un centro hospitalario de Vigo, onde se está recuperando. Ademais, o suceso provocou un incendio no garaxe da vivenda que ambos compartían.
Losada informou de que o suposto agresor sufría problemas psiquiátricos e estaba medicado, segundo as primeiras investigacións da Garda Civil. Por iso, tamén foi desprazado ao Hospital Álvaro Cunqueiro para a súa valoración. A Benemérita trata agora de pescudar se as lesións sufridas polo pai se deben a un acto intencionado ou accidental. Respecto diso, o subdelegado expresou “todo o seu apoio” ás familias con pacientes con enfermidades mentais que sofren brotes psicóticos agresivos.
Segundo el, isto trátase dun “problema grave” que na provincia está a manifestarse “repetidamente”, polo que mostrou a súa “preocupación” pola “desatención” deste tipo de pacientes, ante “intolerables” listas de espera que en psiquiatría superan os 100 días, segundo dixo. Tamén apuntou á “escaseza ou inexistencia” de recursos para a atención a estas persoas e ao “deficiente” funcionamento da Fundación Pública da Consellería de Política Social, encargada de tutelar a persoas adultas. Abel Losada lembrou que o ano pasado faleceron tres anciás agredidas polos seus fillos ou irmáns e outras dúas mulleres sufriron feridas. “Unha vez máis, dar a voz de alerta ante un problema sanitario que está a ter repercusións directas e graves na seguridade cidadá”, sentenciou.
