Un mozo, A.R.A. de Vigo e 33 anos de idade, foi detido na mañá do pasado luns tras ser interceptado mentres circulaba drogado e con varios estupefacientes en distintas cantidades, viagra e diñeiro en efectivo no seu coche.

Tal como informa a Policía Local, os feitos ocorreron na rúa Emilio Martínez Garrido, cando os axentes observaron que un condutor non sinalizaba co intermitente un cambio de dirección. Por iso, procederon a darlle o alto, comprobando que o home presentaba claros síntomas de atoparse baixo os efectos do consumo de sustancias. Ao realizarlle a proba, deu positivo en anfetaminas, metanfetaminas e cocaína.

A maiores, realizouse unha inspección do interior do vehículo, atopando máis de 15 gramos de haxix, 3,4 gramos de anfetaminas, cantidades menores a un gramo de speed e de MDMA, así como dous porros e dúas pastillas de viagra. Ademais, no interior do automóbil había case 300 euros en efectivo fraccionados en billetes de 100, 50, 20, 5 e moedas dun euro. Ante esta situación, o home foi detido como presunto autor dun delito contra a saúde pública.