O grupo municipal do PP no Concello de Vigo criticou este martes que o goberno local de Abel Caballero sumou un novo “fracaso” na obtención de fondos europeos, ao quedar “fóra das axudas” para a transformación dixital e modernización de entidades locais que forman parte da Rede de Destinos Turísticos Intelixentes (RDTI), cun proxecto para virtualizar o cartón PassVigo para usos turísticos.
Segundo trasladou o portavoz do grupo ‘popular’, Miguel Martín, o Ministerio de Turismo seleccionou un total de 29 propostas gañadoras, pero non se elixiu a proposta de Vigo, que pedía 4 millóns de euros para pór en marcha este cartón destinado a turistas, co que ofrecerlles información sobre aloxamento e restaurantes, obter descontos ou pagar no transporte público. “O goberno do seu amigo Pedro Sánchez non se cre tanto iso de que somos referencia mundial á altura das grandes capitais, segundo parece”, sinalou Miguel Martín, que acusou ao alcalde, Abel Caballero de “vender, unha vez máis, a pel do oso antes de cazalo”.
Martín cuestionou se o goberno porá en marcha igualmente este proxecto con fondos propios ou se “caerá no esquecemento como tantas outras obras que anuncia e que nunca pasan do titular do día”. O portavoz do PP lembrou que o goberno de Vigo xa perdeu outras oportunidades de conseguir fondos europeos a través de convocatorias do Goberno de España.
Así, referiuse a as dúas ocasións nas que quedou fóra das axudas (1,5 millóns solicitados) para obras de acondicionamento do Pazo de Castrelos, ou os dous intentos errados para lograr 6 millóns no PERTE de dixitalización do ciclo da auga. Outros fondos tiveron que ser devoltos por falta de execución, engadiu Miguel Martín, como os que se ían a dedicar á reforma do mercado de Teis, á creación dunha plataforma de venda ‘en liña’ ou aos parques infantís de Camilo José Cela e O Berbés. “A quen lle vai botar a culpa esta vez? O comodín da Xunta non lle vale”, concluíu o edil popular.
