Axentes da Policía Local de Vigo detiveron a un home de 44 anos de idade, A.P.P., como presunto autor dun delito de quebrantamento de condena, por vulnerar unha orde de afastamento dunha muller, coa que foi sorprendido discutindo nun local da cidade.

Os feitos ocorreron o pasado domingo de madrugada, cando unha dotación policial foi requirida para acudir a un establecemento da rúa Lepanto, onde se estaba producindo unha suposta discusión de parella.

Segundo relataron as testemuñas, a parella estaba no local e comezaron a intercambiarse reproches, ata que a discusión elevouse de ton e o home comezou a insultar á muller. Un dos empregados afeoulle a conduta e, ao comprobar que unha patrulla do 092 pasaba pola zona, requiriron a presenza dos axentes.

O home tentou fuxir pero foi interceptado e identificado os axentes, que puideron comprobar que lle figuraba en vigor unha prohibición de achegarse ou comunicarse coa muller coa que estaba no local, ditada por un xulgado de Cangas. Por iso, foi detido por un suposto delito de quebrantamento de condena.