A cidade de Vigo ultima xa os preparativos da Reconquista 2025, que este ano comezará o sábado 22 de marzo con varias actividades, como a destitución da corporación afrancesada, aínda que os días grandes serán do 28 ao 30, domingo no que se celebrará a expulsión dos franceses.

Así o sinalaron o alcalde, Abel Caballero, e o presidente da Asociación Veciñal e Cultural Casco Lanuxe de Vigo, Pepe Fumega, durante a rolda de prensa de presentación do evento, quen reivindicaron que se trata de “unha das grandes festas de Galicia”.

Precisamente o rexedor dixo que a Reconquista é unha forma de “rememorar feitos históricos” e animou aos cidadáns a que se “vistan de época” para pasear e gozar da celebración.

Pola súa banda, Fumega expuxo as principais actividades da Reconquista 2025 que, a pesar de que os tradicionais postos abrirán desde o venres 28 ao domingo 30 no Casco Vello de Vigo, o fin de semana anterior arrincará cunha serie de propostas lúdicas.

Por exemplo, o sábado 22 ás 13.00 horas levará a cabo un concerto da orquestra Kv2211 na Colexiata, ademais doutras actuacións musicais ao longo do día. Esa tarde, sobre as 20.00 horas, representarase a destitución da corporación afrancesada, sendo elixido alcalde Francisco Javier Vázquez Varela, un dos principais artífice da Reconquista.

Esa semana, o martes 25, celebrarase a Reconquistiña, que reunirá a preto de 2.000 escolares vigueses, os cales andarán desde a Praza do Rei ata a Porta do Sol, onde gozarán dunha chocolatada.

Ás 11.00 horas do venres 28, festivo na cidade, abrirá o tradicional mercado da Reconquista de Vigo, que permanecerá aberto ata as 23.30 horas, do mesmo xeito que o sábado, mentres que o domingo pechará ás 21.00 horas.

Durante tres días haberá numerosas actuacións musicais polas rúas da cidade, sendo o domingo ás 18.00 horas o acto principal da celebración, coa expulsión dos franceses.