O alcalde de Vigo, Abel Caballero, esixiu ao presidente da Real Federación Española de Fútbol (RFEF), Rafael Louzán, “que tome decisións” tras as afirmacións do conselleiro Diego Calvo, sobre a falta de influencia da cidade á hora de postularse como sede para o Mundial, e do vicepresidente da Federación Galega, Fernando Iglesias, que constatou que a candidatura viguesa non quixo contar con esta entidade.
Así o trasladou o rexedor en declaracións remitidas aos medios, na que informou de que o goberno local dirixiuse por carta a Louzán para pór no seu coñecemento as manifestacións “tan graves” do conselleiro e do vicepresidente da Federación Galega e que, ao seu xuízo, “pon nun brete” a decisión da RFEF de excluír a candidatura de Vigo para ser sede do Mundial do Fútbol. Segundo lembrou o alcalde, Diego Calvo afirmou nunha carta dirixida ao goberno local que lamentaba as posibles carencias da proposta viguesa xunto coa “ausencia de influencia do goberno local”, que non permitiron que Vigo pasase o corte.
Por outra banda, sinalou que Fernando Iglesias constatou que Vigo “en ningún momento do proceso quixo contar coa Federación Galega” porque quería “ter unha relación directa coa Real Federación Española de Fútbol e o CSD sen contar coa Federación Galega”. Segundo expuxo o alcalde, Iglesias constatou que Vigo fixo “todo o contrario que A Coruña que, desde o primeiro momento, mostrou o seu desexo de ter á Federación Galega como intermediaria e interlocutora ante o Comité Executivo”.
Para Abel Caballero, “chama a atención” que, por unha banda, o conselleiro de Presidencia, Xustiza e Deportes, afirme que “se tiveron en conta as influencias” no proceso de selección das sedes; e que, por outra banda, o vicepresidente da Federación Galega apunte que era “un mérito puntuable” ter a esta institución como intermediaria. “Consideramos que a Real Federación Española de Fútbol ten que coñecer estas dúas cuestións e proceder da forma que considere oportuno. Pero estas dúas afirmacións dun consellero e do vicepresidente da Federación RFEF de expulsar a Vigo e de non considerar a Vigo como sede do Mundial. Teñen que tomar decisións e teñen que ver que fan diante de dúas afirmacións tan graves e tan importantes”, sentenciou o alcalde.
