A sesión plenaria extraordinaria solicitada polos grupos municipais da oposición en Vigo (PP e BNG) para reclamar explicacións ao alcalde e ao goberno local pola sentenza que obriga a pagar á promotora do concerto de Guns N’Roses case 2 millóns de euros celebrarase finalmente o 13 de marzo ás 9.00 horas. Os grupos da oposición presentaron a solicitude o pasado 20 de febreiro (son necesarias as firmas de polo menos 7 edís para forzar a convocatoria) e nela ‘populares’ e nacionalistas sinalan que a sentenza que condena ao Concello é “absolutamente demoledora” e evidencia as “irregularidades” na tramitación dese contrato de patrocinio e na convocatoria dun concurso “a medida” que, finalmente, quedou deserto.

Así, PP e BNG solicitan que o alcalde, Abel Caballero, “pida perdón” aos vigueses por esta actuación e por “negarse a dar explicacións”. Igualmente, reclaman o cesamento da concelleira de Contratación, Patricia Rodríguez, e que se depure a responsabilidade do que era edil de Festas, Pablo Estévez. Finalmente, os grupos da oposición reclaman a constitución dunha comisión municipal de investigación sobre este contrato, a creación dunha ordenanza de transparencia na xestión, a posta en marcha dunha Oficina Municipal Anticorrupción e a adopción de medidas de control da contratación.