O grupo municipal do BNG en Vigo reclamou este luns que o Concello se converta nun “axente normalizador” da lingua galega, ante o retroceso do seu uso na cidade máis grande de Galicia, e censurou que a ordenanza municipal de Normalización Lingüística é “sistematicamente incumprida” polo goberno local de Abel Caballero. “É irracional e un síntoma de autoodio e de clara ‘galegofobia’ que Abel Caballero insista en destinar a actividades de normalización do noso idioma menos do 5 % do que gasta nas bolsas de inglés“, advertiu o portavoz do grupo nacionalista, Xabier Pérez Igrexas, que sinalou que o rexedor é “o primeiro” en vulnerar a normativa municipal, que fixa o galego como idioma oficial e lingua vehicular do Concello.

Pérez Igrexas chamou ao goberno local a “abandonar a inercia” e pór en marcha medidas para estender o uso do galego, entre as que propón a realización dun estudo sociolingüístico en colaboración coa Universidade de Vigo para coñecer a situación da lingua na cidade, xa que o último informe data do ano 2002. “Un punto de partida para levar adiante as medidas necesarias para a normalización do seu uso”, explicou. Por outra banda, pediu tamén “un ambicioso programa de promoción da lingua galega”, dotado polo menos con 150.000 euros, e que se renove de forma urxente o Consello Social da Lingua, pendente desde 2019.