A Garda Civil investiga a catro novos, un de 18 anos e tres menores de 17, pola súa suposta participación nunha malleira grupal a outro menor de 16 anos ocorrida no verán de 2024 nas festas de Praia América, en Nigrán. Segundo explica a Benemérita nun comunicado, os feitos tiveron lugar o 31 de xullo, cando un grupo de persoas agrediron a un menor, propinándolle varias patadas e puñadas, tendo que ser trasladado ao hospital, onde se lle diagnostican varias fracturas de pezas dentais, ematomas e feridas na cara que necesitaron puntos de sutura.

Ademais, no transcurso da pelexa, varios amigos da vítima tentaron auxilialo, recibindo tamén puñadas e patadas, provocando a un deles lesións nun tímpano e un hematoma ao redor do ollo. Por todo iso, os menores agredidos presentaron denuncia ante a Garda Civil que, tras unha “longa e minuciosa investigación”, logrou identificar aos agora investigados, sendo “clave” a declaración de numerosas testemuñas e os recoñecementos fotográficos. A orixe desta agresión puidese ser unha discusión provocada polos “ciumes” dun dos atacantes ante o feito de que o menor agredido saudase a unha moza que formaba parte do grupo no que se atopaban os agresores. As dilixencias foron entregadas na Fiscalía de Menores de Pontevedra e no Xulgado de Garda de Vigo.