O Real Club Celta de Vigo e a Comunidade de Montes de Tameiga, en Mos, puxeron fin ao conflito iniciado fai máis de sete anos pola construción da Cidade Deportiva Afouteza na zona, tras unha “reestruturación” do proxecto previsto.
Nun comunicado, o Celta celebrou que, “co esforzo de todos”, liquidouse un enfrontamento “enquistado durante varios anos”, alcanzando un acordo coa Comunidade de Montes para pór fin “a un cru conflito, negativo e prexudicial” para ambas as partes. Para chegar a este pacto, o club subliñou o seu “intenso labor” para “reestruturar” o proxecto sen renunciar ás instalacións previstas, mantendo o contido da cualificación da Declaración de Interese Autonómico.
“Este arduo traballo permitiu liberar unha elevada porcentaxe do chan da Comunidade de Montes de Tameiga, algo máis do 80%, que xa non se verá afectado o desenvolvemento da cidade deportiva celeste, que mantén a práctica totalidade das instalacións planeadas para albergar aos equipos de canteira e o mini estadio para o filial e As Celtas, ademais das infraestruturas e contidos previstos en GS360”, indicou o Celta.
REDUCIR O IMPACTO
Por tanto, segundo subliñou, o proxecto mellora na súa adaptación á contorna reducindo a ocupación sobre o monte veciñal. Ademais, establécese o compromiso de control e garantía total para a non afección das traídas históricas de Tameiga, tal e como fixo coas traídas da comunidade de Pereiras. “Este acordo que pecha o círculo da paz social inclúe tamén o prezo da futura expropiación dos terreos afectados, polo que non queda practicamente pendente ningún punto susceptible de xerar conflito”, reivindicaron.
Do outro lado, a Comunidade de Montes de Tameiga retirará a totalidade das accións xudiciais en marcha e renuncia a emprender ningunha outra no futuro para posibilitar o correcto desenvolvemento do proxecto celeste.
ras coñecerse a noticia, este luns o Concello de Mos enviou un comunicado de prensa celebrando o acordo entre Celta e Comunidade de Montes, xa que a cidade deportiva é “unha das maiores oportunidades históricas” para o municipio, segundo reivindicou a alcaldesa, Nidia Arévalo.
