Un veciño de Vigo sentará este mércores no banco dos acusados do xulgado do Penal 3 da cidade, como suposto autor dun delito de posesión e distribución de pornografía infantil, e a Fiscalía pide para el 3 anos de prisión. Así, segundo figura no escrito de acusación pública, as forzas policiais tiveron coñecemento de que, o 25 de novembro de 2021 e o 27 de xaneiro de 2022, descargáronse a un teléfono arquivos de pornografía infantil a través da aplicación WhatsApp.
As pescudas permitiron identificar o IP e o titular dese teléfono, que resultou ser un veciño de Vigo. Os axentes incautáronse do móbil e, na inspección posterior, atoparon 71 arquivos de contido pedófilo, imaxes nas que podían verse relacións sexuais explícitas entre adultos e menores, e entre menores, con e sen penetración. Ademais, o investigado tamén compartiu por WhatApp as imaxes. Por estes feitos, a Fiscalía considérao autor dun delito de posesión e distribución de pornografía infantil, e pide que sexa condenado a 3 anos de prisión, e que sexa inhabilitado para exercer profesión ou actividade que leve contacto con menores durante 8 anos.
