O Xulgado do Social número 2 de Vigo condenou ao grupo automobilístico Stellantis por “descriminar” a empregados en situación de incapacidade temporal ao reducirlles a paga de beneficios.

No seu fallo, o maxistrado estima a demanda interposta pola Central Unitaria de Traballadoras (CUT) e declara contraria á lei as previsións de redución da parte teórica individual da paga variable de beneficios que establece o esquema de remuneracións de Stellantis para o período 2024-2027 por causar “discriminación directa e, subsidiariamente, indirecta por razón de saúde”.

Así, condenou tanto a Stellantis España como aos sindicatos CC.OO., UGT e SIT a cumprir as consecuencias económicas desta declaración, xa que esta medida foi asinada durante a negociación do novo convenio colectivo da empresa por estes sindicatos.

Pola súa banda, nun comunicado, a CUT celebrou esta decisión xudicial, indicando que, a pesar de que outros sindicatos e a empresa asinen acordos, estes non poden ir en contra da lexislación vixente. “Unha discriminación é unha discriminación aínda que a acepten CC.OO., UGT e SIT”, subliñou o secretario da sección sindical da CUT en Stellantis Vigo, Aclamación Mariño.

“Unha vez máis se pon de manifesto que o sindicato maioritario en Stellantis asina acordos que van en contra da lexislación e sobre todo que atentan contra os dereitos dos traballadores. Só teñen en conta as necesidades da empresa, nunca as necesidades das persoas”, lamentou Mariño. A pesar de todo, esta sentenza é recurrible ante o Tribunal Superior de Xustiza de Galicia (TSXG).