O 27 de abril do 2009 un diario da cidade Olivica sacaba á luz unha noticia en referencia ao AVE a Vigo por Cerdedo, e é que a Asociación Profesional de Peritos e Enxeñeiros, (a cal presidia quen subscribe este articulo), solicitaba un estudo alternativo á opción por Cerdedo, e propoñía unha alternativa por Mondariz. Na asociación de Enxeñeiros realizaramos un estudo meticuloso no que se obtiña como resultado que a opción de Mondariz reduciría o tempo de viaxe nuns 40 minutos comparándoo co traxecto a través de Santiago, e uns 25 minutos comparándoo coa citada variante de Cerdedo, sendo ademais que esta opción tamén permitiría abaratar un 28 por cento o custo do billete, así como captar máis pasaxeiros.
Trasladamos o noso parecer a Abel Caballero coa sá intención de colaborar e de que Vigo tivese un AVE directo de verdade, porque como lle afirmamos ao alcalde a opción de Cerdedo non se ía a executar nunca, xa que segundo os nosos cálculos era inviable económicamente xa que só reducía en 10 minutos o traxecto a Vigo por Santiago, e o custo da obra era de miles de millóns que o ministerio non ía gastar para un aforro de 10 minutos, e que a variante por Mondariz era máis económica e ademais reducía en 40 minutos o traxecto por Santiago, ademais de captar máis pasaxeiros, por tanto esa si era unha opción viable…Abel Caballero dixo que non a Vigo polo simple interese político de defender o que consideraba a súa proposta, e ese ego persoal e político supoñerá que o AVE directo a Vigo nunca existirá…Cerdedo nunca se executará, díxeno no 2009, e repítoo no 2024.
O mesmo diario da cidade Olivica que publico aquela proposta da nosa Asociación Profesional agora, o 26 de novembro de 2024, publicou a noticia de que o proxecto da conexión de Alta Velocidade entre Vigo e Ourense por Cerdedo, que leva vinte anos nas promesas do Goberno coa cidade, sumará outros vinte anos máis, porque existe un bloqueo administrativo, e que este bloqueo provoca que a liña non vaia a estar en servizo ata o 2042. Agora o Ministerio de Óscar Puente quere aproveitar a liña do Miño, porque o ministerio xa recoñece que a liña de Cerdedo é inasumible polo sobre-custo que supoñería unha liña chea de viadutos e túneles para un aforro paupérrimo de tempo. Sen dúbida desde o punto de vista económico a proposta do ministerio de Óscar Puente é moito mellor, pero desde o punto de vista do aforro do tempo, e da relación investimento produción, seria moito mellor a liña que na seu dia propuxemos por Mondariz.
Como Cerdedo non se vai a executar nunca, a pesar das mentiras e enganos de Abel Caballero, e a liña de Mondariz nunca obtivo unha atención real por parte do ministerio, deixemos de marear a perdiz, aproveitemos a liña do Miño, e fagamos un AVE a Vigo o mais directo posible para que Vigo deixe de ser unha cidade de segunda, ferroviariamente falando.
