A Garda Civil, nunha operación conxunta coa Garda Nacional Republicana, detivo este mércores na área de Vigo a catro cidadáns españois, que actuaban como rede de apoio a unha banda internacional de atracadores que foi desarticulada hai semanas en Portugal.
Segundo informou o subdelegado do Goberno na provincia de Pontevedra, Abel Losada, o catro detidos este mércores daban apoio loxístico aos atracadores (dous cidadáns italianos, dous albaneses e un marroquí), con vivendas e vehículos, para que estes cometesen os atracos en Portugal.
Ademais da detención, leváronse a cabo varios rexistros en vivendas de distintos puntos da provincia, e procedeuse á incautación de máis de 100.000 euros localizados.
Os presuntos atracadores, aínda que actuaban no país veciño (con asaltos a varias xoiarías), residían en vivendas da provincia de Pontevedra, principalmente na comarca de Arousa.
Os detidos na área de Vigo serán postos este xoves a disposición da Audiencia Nacional, xa que sobre eles pesaba unha euroorden de detención.
Losada felicitou á Garda Civil e a Garda Nacional Republicana por esta operación conxunta, que “demostra a magnífica e eficaz colaboración” entre as forzas de seguridade de ambos os países.
