O alcalde de Vigo, Abel Caballero, insistiu este martes en que o Goberno de España xa confirmou o seu compromiso de construír, para 2030, o trazado do AVE Vigo-O Porto “na parte española”, é dicir, desde a cidade olívica ata a fronteira, e instou ao presidente da Xunta, Alfonso Rueda, a lograr “do seu amigo” Luís Montenegro, primeiro ministro de Portugal, o mesmo compromiso con respecto ao tramo no país veciño. En declaracións remitidas aos medios, o alcalde de Vigo referiuse ao acto cívico convocado para este mércores pola Xunta en defensa desa conexión ferroviaria (no que vai participar o alcalde do Porto, Rui Moreira), e reclamou ao PP que acuda a ese acto “co visto e prace” de Portugal ao prazo de 2030, porque, lembrou Caballero, foi Portugal o que pediu atrasalo a 2032.

“Se Rueda e Feijóo non son capaces de asegurar, no nome de Portugal, que (o país veciño) tamén o fará en 2030, non sei para que fan ese acto”, proclamou Abel Caballero, que lembrou que el mesmo falou co Executivo de Pedro Sánchez e logrou o compromiso para o proxecto en territorio español, reafirmado nas últimas horas por “nada menos” que o secretario de Estado de Transportes. Tras ese anuncio de España, o alcalde preguntou que fará Portugal e engadiu que “é o que ten que conseguir Rueda do seu amigo, o primeiro ministro de Portugal”. “Que non nos veña a Xunta con contos chineses”, subliñou, antes de volver lembrar que a tramitación do AVE Vigo-O Porto está en marcha na parte española, mentres que non é así en Portugal.

“ESCASA CREDIBILIDADE DO GOBERNO”

Pola súa banda, o grupo municipal do PP criticou que o alcalde “se aferra á escasa credibilidade do goberno de Pedro Sánchez, que en menos dun mes dixo unha cousa e a contraria”, e apuntou que a “rectificación” para volver referirse ao prazo de 2030 pode ser unha estratexia para “desmerecer” o acto deste mércores, que “fronte á súa soidade na Porta do Sol, contará con multitude de axentes políticos, económicos e sociais”. O portavoz do grupo, Miguel Martín, advertiu ao alcalde de que “non pode esixir nada a ninguén mentres o Goberno de España non publique un cronograma claro e conciso”. “Cando vai acabar o estudo informativo en marcha, que acumula máis de seis meses de atraso? Cando se iniciarán as obras? Como vai estar entón operativa a alta velocidade ferroviaria entre Vigo e a fronteira portuguesa en 2030? Se é que non saen as contas”, subliñou o representante municipal do PP.