Dez policías locais de Vigo desprazaranse voluntariamente esta semana a Paiporta para axudar ás vítimas da DANA que sufriu o Levante español fai xa máis de 20 días. Nun audio difundido aos medios de comunicación, o alcalde, Abel Caballero, agradeceu a estes axentes o seu traballo, explicando que estarán a prestar servizo na Comunidade Valenciana ata o vindeiro martes.
Eles viaxarán cun furgón policial e un coche patrulla, así como con diferentes medios técnicos, indicando o rexedor que as riadas tamén arrasaron co material e cos coches da Policía Local de Paiporta. Caballero lembrou que hai uns días volveron de alí os bombeiros municipais que se trasladaron ás zonas afectadas para axudar nos labores de limpeza e rescate.
Precisamente este martes, a representación da CUT nos Bombeiros de Vigo criticou en redes sociais a situación que viven desde hai anos, urxindo unha “solución definitiva” para ofrecer “seguridade o cidadán” e para poder traballar baixo as condicións de seguridade debidas. “Asombrados pola xestión da emerxencia en Valencia, pero non atendemos á información que nos alerta de que aquí as emerxencias están mesmo peor”, lamentaron, nomeando ao alcalde olívico e a concelleiros nun tuit.
