A sección quinta da Audiencia Provincial de Pontevedra, con sede en Vigo, celebrou este pasado xoves unha vista para prorrogar a prisión provisional do home condenado por asasinar á súa veciña na rúa Zamora da cidade olívica.
Todo iso despois de que o home fose condenado pola Audiencia a 20 anos de cárcere por estes feitos, sendo despois ratificada esta pena polo Tribunal Superior de Xustiza de Galicia (TSXG). Con todo, a sentenza non é firme, xa que foi recorrida ao Tribunal Supremo.
Esta vista levou a cabo debido a que a defensa do acusado solicitou a súa liberdade provisional, pois xa cumpriu dous anos de prisión preventiva e considera que “non hai indicios de risco de fuga, podendo constituír o mantemento da medida un risco irreparable no caso de que se estime o recurso formulado polo Tribunal Supremo”.
No entanto, a Audiencia si considera que hai “risco de fuga polo elevado da pena”, o que se suma a que a sentenza xa foi validada en segunda instancia polo TSXG. “Estimamos oportuno prorrogar a prisión provisional ata o límite da metade da condena imposta”, subliña o auto.
FEITOS
Todo ocorreu en outubro de 2022 na rúa Zamora de Vigo, onde Pablo P.V. acabou coa vida da súa veciña. Segundo o relato de feitos probados da sentenza, contra a que aínda cabe recurso, asasino e vítima tiñan “problemas de convivencia” por uns ruídos que o procesado imputaba á muller. O día dos feitos (23 de outubro de 2023), segundo a resolución, atopáronse por casualidade no exterior do inmoble.
O condenado, entrou no portal, volveu saír inmediatamente e, tras dicirlle a muller “vai á merda”, entrou de novo ás 20.12 horas e subiu ao seu apartamento. Ás 20.51, a vítima pasou por diante do estudo do seu veciño e, cando estaba a abrir a porta da súa casa, o acusado “achegóuselle por detrás con intención de causarlle a morte, portando un coitelo vermello” cunha folla de 20 centímetros de longo.
O xurado vira acreditada a existencia de aleivosía, que serve para cualificar o homicidio en asasinato, pois subliña que o ataque coa arma branca “produciuse estando a prexudicada de costas, de maneira sorpresiva e repentina”. A afectada, por tanto, “nada puido facer para defenderse”.
A primeira acometida, segundo o fallo, foi por detrás e dirixida á rexión dorsal. A muller gritou pedindo axilio dúas veces e tentou agarrar a arma coa man esquerda, pero o acusado continuou apuñalándoa en varias zonas. O home foi condenado a 20 anos de cárcere por un delito de asasinato.