Un cento de persoas derrubou na tarde deste xoves en Vigo “o muro da vergoña”, que simbolizaba o bloqueo de Gaza, e pediron a liberación de Palestina. Convocados pola Plataforma Cívica Vigo Prol Palestina, a partir das 18.00 horas, decenas de cidadáns fóronse achegando á Porta do Sol da cidade olívica para protestar pola guerra en Oriente Próximo e para apoiar ao “pobo palestino” que está a sufrir un “xenocidio”.

Alí, amontoaron caixas de cartón formando un muro, simbolizando o bloqueo da Franxa de Gaza, onde non se permite a entrada nin de alimentos nin de auga nin de medicamentos, como apuntaron desde a organización. A berros de ‘Palestina libre’ ou ‘Onde están, que non ven, as sancións a Israel?’, os manifestantes alzaron a voz tras un ano desde o estalido da guerra.

“Hai 2,2 millóns de persoas atrapadas nunha gaiola de aceiro e lume”, lembraron desde a organización, insistindo en que Gaza “non está lonxe”, senón no “corazón” dos vigueses. Tras escribir unha serie de mensaxes reivindicativas e de apoio, que foron colgados no muro, os manifestantes finalmente derrubaron as caixas, simbolizando a liberación de Palestina.