“Hoxe martes unha traballadora social do Concello de Vigo recibiu á señora que tiña unha ameaza de desafiuzamento, e nesa reunión decidiuse a asignación dunha axuda de emerxencia para distintos fins e reiteróuselle o ofrecemento dunha axuda de aluguer para o piso que ela busque”, sinalou en rolda de prensa Carlos López Font, concelleiro socialista.
“Estamos a concluír o proceso de pago do cheque social ás familias que o necesitan, xa só quedan 30 solicitudes pendentes ás que se lle atenderá igualmente. En 2018 entregamos 5.611 axudas a un total de 1.937 solicitantes. En alimentación, por tarxetas da dignidade, 1.937, en enerxía outras 1.937, e en vivenda igual, para aluguer ou pago de hipoteca”, enumerou.
“2.532.000 euros de política social. É o orzamento social máis importante de España”, asegurou Font en rolda de prensa: “Facemos unha política social real, que chega aos vigueses. Os de Marea de Vigo danlle pisos aos seus amigos en Coruña e nós aos vigueses que máis o necesitan”.
De feito, Font aproveitou para atacar a Marea de Vigo dun xeito que recorda a como falan do PP no Concello: “Sempre están en contra desta cidade, de que esta cidade evolucione e de que lle vaia ben. Recordo que xa estiveron en contra de Citroën e estou seguro de que lles encantaría que a este concello lle fora mal economicamente e estivese na ruína. Moléstalles e moito que a operación do concello co auditorio fose excelente para a cidade de Vigo e para os vigueses”.
O relatado por Font, non obstante, contrasta coa situación da Acampada contra a Pobreza, que levan máis de ano e medio agardando para ser recibidos polo Concello.
