O derrame sobre a estrada de varias garrafas de formaldehído que transportaba un camión obrigou a activar un plan especial para xestionar a situación no polígono vigués de Valadares. Segundo informou o CIAE 112 Galicia, o accidente produciuse na rúa O Cabreiro, na parroquia de Beade, minutos despois das 09.00 horas deste mércores.

O suceso motivou a activación por parte da Xunta do Plan de Protección Civil por accidentes con vehículos de transportes especiais, denominado Transgal. Ademais, o tráfico estivo cortado durante uns minutos ata que se controlou a situación. En total, o camión perdeu cinco litros de formaldehído cando descargaban as garrafas desde o camión, cuxos responsables puxeron o incidente en coñecemento da central do 112, encargados de activar o dispositivo para atallar a emerxencia creada.