A Audiencia Provincial de Ponteveda acolle este mércores un xuízo contra un home, de nacionalidade portuguesa, para o que Fiscalía solicita case nove anos de cárcere por tentar violar a unha turista alemá nun hotel de Vigo.

Os feitos, segundo consta no escrito do Ministerio Público, ocorreron o 11 de xuño de 2023. Sobre as 7.30 horas da mañá, o acusado accedeu á habitación da muller, “de forma que non consta”, vestindo soamente uns calzóns e levando un preservativo.

Mentres a vítima durmía, sempre segundo o relato da Fiscalía, achegouse a ela e, cando fixo que se espertase, agarrouna. En todo momento, a muller opuxo “forte resistencia” e tentou saír do cuarto, pero o home “iniciou un forcejeo” e suxeitouna.

O acusado chegou a tirala ao chan, taparlle a boca e apertarlle o pescozo para que non gritase. Con todo, ante a defensa exercida pola vítima e os seus berros de auxilio, conseguiu finalmente saír da habitación.

Como consecuencia destes feitos, a muller sufriu varias feridas que precisaron 40 días de curación. O acusado foi detido e desde o día seguinte atópase en prisión provisional.

Por todo o exposto, a Fiscalía solicita para o home unha pena de prisión de case nove anos: seis anos menos un día polo delito de agresión sexual con penetración (violación) en grao de tentativa; máis outro tres anos polo de lesións.

Ademais, solicita que indemnice á vítima nun total de 31.650 euros e que non poida comunicarse con ela nin aproximarse a menos de 200 metros dela nin de ningún lugar que frecuente durante 10 anos.