A CIG retomou este xoves as protestas en defensa do sector galego de automoción, cunha manifestación que percorreu a contorna da planta de Stellantis en Vigo, na que participaron delegados sindicais de empresas da comarca viguesa, de Pontevedra e Ourense.
Tras a marcha, representantes do sindicato leron un manifesto no que denunciaban o “futuro incerto” do sector pola falta de política industrial por parte da Xunta e a ausencia de investimentos de Stellantis, de face á fabricación de novos modelos. “Nin os traballadores da empresa principal nin os das auxiliares sabemos a día de hoxe o plan industrial que se vai a aplicar nos próximos anos, porque neste momento está a fabricarse o mínimo de vehículos eléctricos esixidos para manter as axudas e os proxectos”, advertiron.
Así, afearon a “pasivididade” da administración autonómica, que só se decidiu a declarar o sector como estratéxico “despois da campaña de protestas da CIG”.
O sindicato denunciou tamén que as compañías utilizar a industria galega do automóbil como “banco de probas para ensaiar novas fórmulas de aforro de custos en man de obra, e de optimización de recursos para obter os máximos beneficios”. Todo isto, alertaron, tradúcese en “maior precariedade, perda de dereitos e destrución de emprego”.
Mentres, criticaron, as empresas “calan e outorgan”, o Concello de Vigo e Zona Franca “están mudos” e a Xunta “segue xogando un papel irrelevante, sendo unicamente correa de transmisión de Stellantis”. Como consecuencia, o sector está “nun proceso imparable de precarización laboral” e case todas as empresas teñen “ERTE abusivos“, acoden á desregulación de xornada, impoñen quendas, abusan das ETT e dos baixos salarios, a pesar do que igualmente obteñen axudas públicas.
