O alcalde de Vigo, Abel Caballero, tachou de “intolerable” a “subida fuertísima” do canon da Sociedade Galega de Medio Ambiente (Sogama). Nun audio difundido aos medios de comunicación, o rexedor aproveitou para volver cargar contra a Xunta de Galicia, acusándoa de establecer un incremento do custo da recollida e tratamentos de residuos urbanos.
Caballero asegurou que ata o ano pasado o Goberno galego destinaba uns 6 millóns de euros de diñeiro do Executivo central para subvencionar a recollida selectiva, pero neste exercicio retirouse. Por iso, o alcalde calculou que a subida suporá o pago de 2,5 millóns de euros máis, a sumar a eses 6 millóns de euros da subvención que xa non estará dispoñible.
“Que saiba todo Vigo que a Xunta impón unha carga para a recollida de residuos sólidos á cidade intolerable”, engadiu, lamentando novamente que o Goberno autonómico “veña a Vigo a coller recursos para dedicalos a outros lugares de Galicia”.
Todo iso despois de que a semana pasada Sogama aprobase a subida do seu canon, que quedou fixada nun importe medio de 66 euros por tonelada. A empresa pública explicou que esta subida responde a decisións do Goberno central “que están a ter un gran impacto económico no custo do servizo”, como a entrada en vigor do novo imposto estatal á vertedura e á incineración, así como á recuperación do imposto do valor da enerxía eléctrica e á eliminación da retribución que percibía polo investimento realizado na súa planta termoeléctrica.
