A senadora do BNG, Carme da Silva, reclamou ao Goberno que recupere como espazo público a illa de Torralla, en Vigo, de forma que se garanta a entrada aos cidadáns, e denunciou o incumprimento da normativa referente ao dominio público marítimo terrestre. “A desprotección da illa e a súa caótica urbanización chegou ata o extremo de construír un alto edificio de vinte pisos”, explicou a senadora nacionalista. Ademais, incidiu en que aínda que a illa foi “privatizada”, a lei recolle que esta debe ser accesible ao tránsito público nas zonas de servidume e de dominio público terrestre.

Nesta liña, nun comunicado, Carme da Silva lembrou que no ano 2008 o propio Ministerio aprobou un “proxecto de Recuperación do Dominio Público Marítimo Terrestre (DPMT), así como a apertura ao acceso á illa”. A senadora insistiu en que o propio Ministerio de Transición Ecolóxica considera como zona de servidume de protección aquela “franxa de terreos de propiedade privada que linda co dominio público marítimo terrestre e que está suxeita a determinadas limitacións que contén a lei de costas”, polo que denunciou que esta norma non se cumpre na illa viguesa.

Segundo denunciou o BNG, a illa de Toralla foi obxecto da especulación urbanística na década do sesenta tras “entregala” aos “intereses empresariais privados” e proceder á súa urbanización. As modificacións no terreo van desde unha ponte ou un valado ata a incorporación de vixiantes para que só poidan acceder propietarios e persoas autorizadas.

Deste xeito, nunha nota de prensa, os nacionalistas sinalan que a ponte é unha concesión privada que termina en 2064 e que a empresa concesionaria, tamén xestiona outros terreos de Toralla. Segundo a senadora do BNG, o Goberno debe actuar de forma inmediata para “garantir o acceso público e permitir a libre circulación de persoas”.

PROTESTAS VECIÑAIS

No comunicado, o Bloque lembra que varias asociacións veciñais se manifestaron o pasado fin de semana na ponte que une a praia de Vao coa illa para reclamar a súa “recuperación como espazo público” e a apertura dun camiño peonil aprobado en 2008.

O portavoz do BNG no Concello de Vigo, Xabier P. Iglesias, trasladou o seu apoio aos manifestantes e recalcou que en pleno 2024 non debe permitirse que esta illa continúe como un “coto privado para uns poucos VIP”.

O portavoz municipal nacionalista insistiu no compromiso do seu partido para “lograr” que os veciños de Vigo “recuperen” Toralla. Con todo, recalcou a “falta de acción” por parte do Goberno local e a “complicidade” da Xunta para que continúe o incumprimento da norma vixente referente ao dominio público marítimo terrestre.