Deputados do PPdeG no Congreso rexistraron unha Proposición non de Lei relativa ao impulso da liña de alta velocidade ferroviaria Vigo-Porto-Lisboa para o seu debate na Comisión de Transportes e Mobilidade Sustentable.
Nela, tal e como se recolle no documento, instan o Goberno a “recoñecer, como xa se fixo en reiteradas ocasións nos Cumes Hispano-Portuguesa, o potencial de uso e de rendibilidade” desta liña como “unha infraestrutura prioritaria e estratéxica en virtude dos principios de vertebración territorial e de desenvolvemento social e económico de España e de Portugal”.
Ademais, demandan desenvolver unha programación completa das actuacións, investimentos orzamentarios e calendario para o desenvolvemento da conexión Vigo-Porto, coa prioridade do Saída Sur de Vigo, así como impulsar o traballo co Goberno de Portugal para a definición da nova conexión internacional sobre o río Miño ao amparo dos programas de financiamento europeo para as actuacións pertencentes á rede TEN-T.
Así mesmo, mentres non se materialice esta conexión de alta velocidade, piden que se modernice o material móbil e as condicións de servizo do denominado Tren Celta, entre Porto e Vigo, para facer posible esta viaxe nun tempo máximo dunha hora.
