A Xunta de Galicia autorizou a licitación da redacción do proxecto e a execución de dous edificios cun total de 58 vivendas de promoción pública no barrio vigués de Navia, que se construirán no chamado polígono 1 da ampliación desta área. Trátase do sétimo grupo de inmobles que a Xunta licita neste barrio, e destinará neste caso un investimento de 13 millóns de euros. En concreto, licitaranse os servizos de redacción de proxecto e dirección de obra, e de contratación das obras de construción, con técnicas industrializadas e uso de madeira.
Un dos edificios albergará 37 vivendas de promoción pública, garaxes e trasteiros. O plan parcial permite a construción dun edificio cun máximo de 4 alturas máis ático. O outro edificio contará con 21 vivendas, garaxes e trasteiros, e o plan parcial permite máximo de 3 alturas máis ático. En concreto, licitaranse os servizos de redacción de proxecto e dirección de obra e de contratación das obras de construción, con técnicas industrializadas e o uso de madeira, de dous edificios de 37 e 21 vivendas de promoción pública nas parcelas M-IVB-20 e M-IVB-22 do polígono 1 de San Paio de Navia.
Estas dúas obras son as primeiras de Navia que incluirán a aplicación de técnicas construtivas industrializadas, aplicando unha ou varias patentes, que permiten unir arquitectura e prefabricación para optimizar prezo, sustentabilidade, seguridade, calidade e mellor uso e mantemento. Entre esas técnicas inclúese o uso de madeira, tanto na estrutura dos inmobles como noutros elementos.
Neste polígono 1 construiranse un total de 259 vivendas de promoción pública, ás que se engadirán outras 100 vivendas públicas que xa están programadas. A elas súmanse outras 374 vivendas de protección autonómica nese mesmo polígono. Ademais, a Xunta autorizou o pasado 1 de xullo a licitación das obras de urbanización do polígono 2, onde se construirán outras 719 vivendas e un instituto, entre outros servizos.
