Un operario resultou ferido este domingo tras precipitarse desde unha planta dun buque e caer entre os coches doutra das plantas da embarcación, no ámbito da área Portuaria de Bouzas, en Vigo. O accidente, tal e como informou o 112 Galicia, tivo lugar sobre as 13.30 horas deste domingo. Nese momento, o persoal do Servizo de Urxencias Sanitarias de Galicia-061 avisaba ao 112 da caída dun traballador desde unha planta a outra dun barco.

Ao ter coñecemento dos feitos, a central de emerxencias púxose en contacto co persoal da Autoridade Portuaria, que confirmou que xa avisaran aos servizos sanitarios. Así, os operadores do 112 deron aviso á Policía Local e aos Bombeiros de Vigo, que desprazaron unha padiola de rescate para evacuar ao ferido.