O consello de goberno da Universidade de Vigo (UVigo) aprobou este xoves un novo programa de medidas para fomentar o aforro e a eficiencia enerxética, que substitúe ao plan urxente sobre este tema posto en marcha en setembro de 2022 e que tiña como obxectivo reducir entre un 25% e un 30% o consumo de luz nun escenario de escalada de prezos.

Unha vez terminada esta crise enerxética, a institución decidiu reaxustar o seu plan, eliminando por exemplo a prohibición do uso de dispositivos de calefacción individuais eléctricos ou reaxustando os criterios para o uso da calefacción e da climatización.

Segundo explicou a director da área de Servizos Enerxéticos, Camilo Carrillo, a partir de agora, as medidas de eficiencia enerxética en lugar de establecer períodos para a climatización e a calefacción, atenderán a unha temperatura de confort dos espazos interiores e de traballo de 19 graos centígrados cando sexa necesaria calefacción e de 27 graos cando faga falta aire acondicionado, mentres que a humidade debe manterse entre o 30% e o 70%.

Por outra banda, continuarán aplicándose os mecanismos de control necesarios para que os equipos de climatización non funcionen fose dos horarios de apertura dos centros e seguirán sen climatizarse, sempre que sexa tecnicamente viable, os espazos de circulación e os vestíbulos, así como os locais que non estean en uso durante a xornada laboral.

Outro dos puntos centrais do consello de goberno ordinario deste xoves foron as propostas de verificación e modificación de títulos de grao, máster e douturamento para o curso 2025/2026. Respecto diso, abriuse un “intenso” debate, segundo recolle o Diario da Universidade de Vigo (DUVI), sobre a verificación do grao e o máster de Enfermaría.

O profesor Claudio Cerdeiriña, en representación da Plataforma Procampus, lamentou a “falta de consenso” nun tema que afecta a catro escolas e que conta só co apoio de dous delas.

María Reyes Pérez, en nome do profesorado das escolas de Enfermaría do Meixoeiro e de Ourense, manifestou o seu desexo de que o proceso de integración chegue a bo porto, aínda que lamentou que o proceso levase a cabo “sen garantir o lóxico protagonismo que debería ter a comunidade universitaria das escolas adscritas na organización destas titulacións”. En nome do alumnado, Lucía de Luís, fixo fincapé en que se retomase o proceso con comisións que garantisen a participación dos alumnos.

En resposta a todos, o reitor, Manuel Reigosa, subliñou que a integración dos estudos de Enfermaría nunha única facultade é unha “cuestión complexa”, pero tamén unha “necesidade” e un “anhelo” a título persoal del, así como un “proxecto ilusionante”.

Segundo Reigosa, detrás de todo o proceso non hai ningún problema territorial, porque “a facultade terá presenza no tres campus de forma igualitaria e o mesmo ocorrerá co equipo de goberno”. O reitor recalcou que a creación efectiva do centro vai ligado á aprobación dos títulos que nel se van a impartir, polo que “se se decidise pospor este proceso, tiraría xa a toalla porque seguro que xa non sería posible a creación do centro”. Finalmente, si foron aprobados.

En concreto, tras o seu invervención, procedeuse á votación e aprobouse a verificación dunha nova Programación Conxunta de Ensinos Oficiais de Enxeñaría Informática e de Intelixencia Artificial, así como a modificación de dous títulos xa existentes: Enfermaría e Enxeñaría de Tecnoloxías de Telecomunicación.

No referido a os máster, aprobouse a verificación de sete novos títulos: Máster en Literatura Dramática, Música e Artes Escénicas; Máster en Prevención e Abordaxe Multidisciplinar das Drogodependencias e Condutas Adictivas; Máster en Realidade Aumentada; Máster en Ciencia do Exercicio, Preparación Física e Readaptación Deportiva; Máster en Enfermaría de Práctica Cardiovascular e Respiratoria Avanzada; Máster en Creación Artística Contemporánea e Máster en Criminología.

Paralelamente, tamén se deu o visto e prace ás modificacións de tres máster que xa se imparten: Enxeñaría de Telecomunicación; Ciencia e Tecnoloxías da Información Cuántica e Enxeñaría Informática – Mención dual. Finalmente, aprobouse a verificación do novo Programa de doctoramiento en Investigación Sanitaria e a modificación do de Ciencias do Deporte, Educación Física e Actividade Física Saudable.