A Sección 5ª da Audiencia de Pontevedra, con sede en Vigo, xulga o mércores, 19 de xuño, a un home acusado de roubar en dous establecementos hostaleiros da cidade olívica en outubro de 2023. Uns feitos polos que a Fiscalía solicita seis anos de prisión.

Segundo se recolle no escrito do Ministerio Fiscal, o 14 de outubro do pasado ano, sobre as 23:00 horas, o acusado dirixiuse a unha cafetaría que se atopaba pechada neses momentos. Así, “co fin de obter un beneficio económico“, rompeu unha das xanelas do local cunha baldosa e accedeu ao interior. Unha vez alí, o home esnaquizou a caixa rexistradora, da que obtivo 800 euros en billetes e moedas, así como a máquina comecartos, levándose o caixón da recadación cuns 800 euros.

Posteriormente, o día 16, o acusado desprazouse sobre as 06:15 horas a outro bar, que contaba con sistema de gravación. Nesta ocasión, chegou á súa terraza traseira e, tras saltar diversos muros desde a vía pública, accedeu ao terreo. Unha vez na terraza, colleu unha bombona de butano e golpeou o cristal da porta de acceso do interior do local. Ao entrar, ocasionou danos na máquina de apostas, pero non logrou abrila. Ademais, da caixa rexistradora obtivo un total de 53 euros en moedas.

Á súa vez, o sistema de seguridade do local enviou unha alarma aos donos, que viron o que sucedía no interior a través dunha aplicación e deron aviso á Policía, que se atopaba na zona e acudiu ao lugar. Tras unha batida polos arredores, lograron deter ao home, oculto entre uns sofás nun local en obras próximo a rúa Doutor Canoa. Por estes feitos, que Fiscalía considera constitutivos dun delito continuado de roubo con forza en local pechado ao público no momento dos feitos, solicita seis anos de prisión.