A Policía Nacional detivo esta semana a un home, dedicado á repartición de mercadorías en Vigo, por ofertar a cidadáns estranxeiros contratos de traballo falsos, para así poder regularizar a súa situación, a cambio dun pago previo de entre 2.000 e 3.000 euros.
Segundo informa o corpo nacional, a investigación iniciouse fai seis meses, cando froito da colaboración existente entre a Oficina de Estranxeiros da Subdelegación de Goberno de Pontevedra e a Brigada Local de Estranxeiría e Fronteiras da Comisaría Vigo-Redondela, tívose coñecemento de que unha persoa se podería estar a dedicar a estender contratos de traballo ficticios a estranxeiros.
Así, os axentes encargados do caso pescudaron que o detido facilitaría 25 vínculos a cidadáns doutros países nun breve período de tempo e que el se puña como empregador. Estes contratos serían utilizados posteriormente por estas persoas para solicitar o permiso de residencia.
O ‘falso empregador’ dedicábase á repartición de mercadorías na localidade de Vigo pero carecía de empresa e de sede física para o seu desempeño, e unicamente tiña un camión de repartición como útil de traballo. Ademais, as persoas falsamente contratadas por el, que residían en distintas cidades de España, non contaban con carné de conducir, que sería unha condición imprescindible para o posto.
Así mesmo, a Policía confirmou que esta persoa facilitaba os contratos previo pago por parte do cidadán estranxeiro de entre 2.000 e 3.000 euros. Con todo, o empregado nunca chegaba a traballar, ademais de que tiña que pagarse el mesmo os gastos derivados da súa contratación.
