A Xunta de Goberno do Concello de Vigo deu este luns luz verde ao convenio de colaboración coa Deputación de Pontevedra para a reforma da bancada de Gol do estadio municipal do Balaídos, cuxo importe ascende a 26,3 millóns de euros e que ten un prazo de execución de 29 meses.

Segundo explicou o alcalde, Abel Caballero, nunhas declaracións remitidas aos medios, ambas as institucións cofinanciarán, ao 50 %, as obras, e a administración municipal “está xa coa licitación”. A actuación permitirá gañar algo máis de 2.000 asentos para ampliar o aforamento, e do mesmo xeito que na bancada de Marcador, achegaranse os asentos ao terreo de xogo. A obra inclúe a instalación de 6 escaleiras e 8 ascensores.

Así mesmo, segundo explicou Caballero, tamén se construirá un novo tanque de augas pluviais e actuarase na fachada de tribuna para cubrir parte da fronte cun espazo porticado. A iso sumarase a ‘humanización’ das rúas Val Miñor, Pablo Iglesias e Olímpicos.